ઝેર તો પીધાં છે જાણી જાણી :: મીરાંબાઇ

ઝેર તો પીધા છે જાણી જાણી,
મેવાડના રાણા;
ઝેર તો પીધા છે જાણી જાણી;
નથી રે પીધાં અણજાણી રે,
મેવાડના રાણા.

ઝેર તો પીધા છે જાણી જાણી;
કોયલ ને કાગ રાણા,
એક જ વરણાં રે;
કડવી લાગે છે કાગવાણી રે,
મેવાડના રાણા;

ઝેર તો પીધાં છે જાણી જાણી.
ઝેરના કટોરા જ્યારે રાણાજી મોકલે રે;
તેનાં બનાવ્યાં દૂધ પાણી રે,
મેવાડના રાણા;

ઝેર તો પીધાં છે જાણી જાણી.
સંતો છે માતા રાણા, સંતો છે પિતા રે;
સંતોની સંગે હું લોભાણી રે,
મેવાડના રાણા;

ઝેર તો પીધાં છે જાણી જાણી.
સાધુડાના સંગ મીરાં છોડી દો;
તમને બનાવું રાજરાણી રે,
મેવાડના રાણા;

ઝેર તો પીધાં છે જાણી જાણી.
સાધુડાનો સંગ રાણા નહિ છૂટે અમથી રે;
જનમોજનમની બંધાણી રે,
મેવાડના રાણા;

ઝેર તો પીધાં છે જાણી જાણી.
મીરાં કહે પ્રભુ ગિરધર નાગર;
તમને ભજીને હું વેચાણી રે,
મેવાડના રાણા;
ઝેર તો પીધાં છે જાણી જાણી.