કાનજી તારી મા કે'શે પણ અમે કાનુડો કે'શું રે !
એટલું કે'તા નહીં માનો તો ગોકુળ મે'લી દેશું રે.
કાનજી તારી મા કે'શે પણ અમે કાનુડો કે'શું રે !
માખણ ખાતાં નો'તું આવડતું મુખ હતું તારૂં એંઠુ રે !
ગોપીઓએ તારું ઘર ઘેરાણું જઈ ખૂણામાં બેઠું રે.
કાનજી તારી મા કે'શે પણ અમે કાનુડો કે'શું રે !
ઝુલણી પે'રતાં નો'તું આવડતું અમે તે દિ' પે'રાવતાં રે !
ભરવાડોની ગાળ્યું ખાતો અમે તે દિ' છોડાવતાં રે.
કાનજી તારી મા કે'શે પણ અમે કાનુડો કે'શું રે !
કાલો ઘેલો તારા માત-પિતાનો અમને શેના કોડ રે !
કર્મ સંજોગે આવી ભરાણા આંગણાં જોડાજોડ રે.
કાનજી તારી મા કે'શે પણ અમે કાનુડો કે'શું રે !
ઘૂંટણીયાભેર હાલતો ચાલતો બોલતો કાલું ઘેલું રે !
ભલે મળ્યા મે'તા નરસૈંના સ્વામી પ્રેમભક્તિમાં રે'લું રે.
કાનજી તારી મા કે'શે પણ અમે કાનુડો કે'શું રે !
No comments:
Post a Comment