શંભુ ચરણે પડી માગું ઘડી યે ઘડી કષ્ટ કાપો;
દયા કરી દર્શન શિવ આપો !
તમો ભક્તોના દુઃખ હરનારા, શુભ સૌનું કરનારા;
મારી મંદ મતિ, તારી અકળ ગતિ, કષ્ટ કાપો;
દયા કરી દર્શન શિવ આપો !
અંગે ભષ્મ સ્મશાનની ચોળી, સંગે રાખો સદા ભૂત ટોળી;
ભાલે તિલક કર્યું, કંઠે વિષ ધર્યું, અમૃત આપો,
દયા કરીદર્શન શિવ આપો !
નેતિ નેતિ જ્યાં વેદ કહે છે, મારું ચિતડું ત્યાં જવા ચહે છે;
સારા જગમાં છે તું, વસું તારામાં હું, શક્તિ આપો,
દયા કરી દર્શન શિવ આપો !
હું તો એકલપંથ પ્રવાસી છતાં આતમ કેમ ઉદાસી !
થાક્યો મથી રે મથી, કારણ મળતું નથી, સમજણ આપો;
દયા કરી દર્શન શિવ આપો !
આપો દ્રષ્ટિમાં તેજ અનોખું, સારી સૃષ્ટમાં શિવરુપ દેખું;
આવી દિલમાં વસો, આવી હૈયે વસો, શાંતિ સ્થાપો;
દયા કરી દર્શન શિવ આપો !
ભોળાશંકર ભવદુઃખ કાપો, નિત્ય સેવાનું શુભ ધન આપો;
ટાળો મન મદ, ગાળો સવ સદા, ભક્તિ આપો;
દયા કરી દર્શન શિવ આપો !
શંભુ ચરણે પડી માગું ઘડી રે ઘડી કષ્ટ કાપો,
દયા કરી દર્શન શિવ આપો !
No comments:
Post a Comment